“Qadın evdə otursa, yaxşıdır!”, “Qadınlar hər işə emosional yanaşır”, “Qadının yeri mətbəxdir!” – qadınların iş həyatındakı rolunu, karyera cəhdlərini xor görərək hədəf alan belə ifadələri çox uzatmaq olar, amma biz məsələnin tam əks tərəfində olduğumuz üçün fokus olduğumuz məqamlar da fərqlidir. Lakin bilirik ki, birgə çalışacağımız qadınlar arasında bu və buna bənzər sözləri eşitmiş olanlar az olmayacaq. Elə buna görə də işimizi sağlam təməllər üzərində qurmuşuq. 

Məqsədimiz, hədəfimiz və xidmətimiz iş həyatına atılmaq və biznes qurmaq istəyən xanımlara hərtərəfli dəstək göstərməkdir. Bir psixoloq kimi xanımların mənəvi sağlam və güclü yetişməsinə dəstək olacaq, bir biznes adamı kimi uğurlu karyera sahibələrinə çevrilmələri üçün birgə addımlayacağıq. 

Lakin bu ipin bir ucu sizin əlinizdədir: Siz özünüzə dəstək olmağa qərar vermisinizsə, biz xidmətinizdəyik! “Qərar verə bilmirəm, bir addım irəli, iki addım geri, özümü heç cürə tapa bilmirəm” deyirsinizsə, bu halda da biz yanınızdayıq!